მე მაგრად მიყვარს, ყველგან საკუთარი აზრის დაფიქსირება მინდა. განსაკუთრებით მონდომებით ვავსებ ხოლმე ქართულ გამოკითხვებს -გულწრფელად მჯერა, რომ ვიღაცას ეხმარება ჩემი +1 პასუხი.

აგერ გავაკეთე გამოკითხვა ბლოგის მკითხველების შესახებ, თუ ბევრი პასუხი იქნა – საინტერესო სტატისტიკა გამოვა, თან რაღაც პერიოდის შემდეგ გავიმეორებთ და ცვლილებების აღრიცხვა შეგვეძლება.

ბლოგერებს ძალიან გთხოვთ,  შევსების გარდა დააგდოთ ლინკი თქვენს ბლოგებზეც:

http://tinyurl.com/gamokitxva

ამის შემდეგ თუ გამოკითხვების შევსების სურვილი გაგიმწვავდათ, შეგიძლიათ დაეხმაროთ სხვებსაც:

გამოკითხვა თბილისის სატრანსპორტო სისტემის შესახებ

გამოკითხვა “ინგლისური ჩაის სახლის” შესახებ

გამოკითხვა ზოგადად ჩაის შესახებ

რჩევა:

თუ გამოკითხვის შექმნა გსურთ, უამრავი სერვისია ამისთვის ინტერნეტში, თუმცა დაივიწყეთ ყველა, მითუმეტეს, როცა არსებობს გუგლის პროდუქტი! იმედია gmail-ის ექაუნთი გაქვთ – შედით docs.google.com  და form-იდან შეგიძლიათ კარგი, ჯანსაღი, ადვილად გასაკეთებელი, პასუხების კარგად შემნახველ-დამკონვერტირებელ-მავიზუალიზირებელი გამოკითხვის შექმნა. I adore Google. I adore Google Docs more!

ჰო, და როცა დაგჭირდებათ – მომაწოდეთ ხოლმე გამოკითხვის ლინკები, შემჩნეული ვარ მათი ხალისით შევსებასა და გავრცელებაში.

პოსტი არ არის განკუთვნილი მათთვის, ვისთვისაც ბლოგი უბრალოდ ვორდის ონლაინ-ვერსიაა და ვინც არ არის დაინტერესებული მკითხველის რაოდენობის გაზრდით.

რა არის ნებისმიერი ბლოგერის სტიმული?

მკითხველები და მათთან ურთიერთობა.

რა სჭირდება ქართველ ბლოგერს?

მეტი სტიმული – მეტი მკითხველები!

ქვემოთ გთავაზობთ ჩემ მიერ აპრობირებულ (ეუფ!) რამდენიმე მარტივ მეთოდს, თუ როგორ გამოვჩეკოთ მეტი მკითხველი ჩვენი ბლოგისთვის.

1. ქართული მთვლელი/კატალოგები

არსებობს რამდენიმე ქართული მთვლელი, top.ge, interes.ge და ა.შ. პირადად ჩემი რეკომენდაციაა Top.ge-ზე გაწევრიანება და მისი მთვლელის დადება ბლოგზე.

რატომ?

Top.ge ქართულ საიტებს შორის ერთ-ერთი ყველაზე პოპულარულია, ის წარმოადგენს ქართული საიტების ყველაზე სრულ კატალოგს. სტატისტიკას ჩავხედე და ბოლო 30 დღის მანძილზე 4 000-ზე მეტი კლიკია გაკეთებული ტოპ.გე-დან აქ.

აქვე გასათვალისწინებელია რამდენიმე ფაქტორი – კატეგორია, სადაც სვამთ ბლოგს. ძირითადად ბლოგერები შეყუჟულნი ვიყავით კატეგორიაში “Personal pages”, რადგან ბლოგების კატეგორია ცალკე არ არის. თუმცა ზოგი ბლოგერი შინაარსის მიხედვით უსადაგებს კატეგორიას -მაგალითად, კარაგანდა – ლოგიკურია, რომ ხელოვნების განყოფილებაში აქვს ბლოგი.

პირადად მე რამდენიმე დღის წინ გადავწყვიტე შემეცვალა კატეგორია, დიდხანს ვიფიქრე – “ინტერნეტი” ამერჩია, “ონლაინ ნაგავი” თუ “News, Television, Media, Newspapers” და ბოლოს ამ უკანასკნელზე შევჩერდი [ბლოგინგი ახალი მედიაა, ნიუსის ცნებაც საკმაოდ წელვადია]. კლიკების რაოდენობამ, რა თქმა უნდა, იკლო, რადგან “პირად გვერდებში” პირველი ადგილიდან უფრო მეტი ხალხი გადმოდის, ვიდრე “მედიის” მეორე გვერდიდან, თუმცა ჩემთვის ასე უფრო საინტერესოა ამ ეტაპზე.

2. იმეილი

იმეილს აქვს “ხელმოწერის” ადგილის ფუნქცია, სადაც ხშირ შემთხვევაში ჩვენი სახელი, გვარი, ტელეფონი და საკონტაქტო ინფორმაცია გვიწერია.

ურიგო არ იქნება, თუ აქვე მივაწერთ ჩვენი ბლოგის მისამართს. თუმცა აქ რამდენიმე ნიუანსია:

არიან ბლოგერები და ბლოგები, მაგალითად სოფი, თაზო – რომელთაც სავალდებულოდაც კი გავუხდიდი სიგნატურაში ბლოგის მისამართის ჩაწერას, იმიტომ, რომ მათი პროფესიიდან გამომდინარე – ბლოგი საუკეთესო სივი/პორტფოლიოა.

თუმცა ცოტა არაადეკვატური იქნება პირადი ბლოგის მისამართის ჩასმა იმეილზე, რომელსაც სამსახურეობრივი დანიშნულებით იყენებთ. ამ შემთხვევაში, თუ ორი მეილი გაქვთ – სამსახურის და “სერიოზული” და შედარებით პირადი – თამამად მიაწერეთ ბლოგი პირადის სიგნატურაში.

3. ფორუმები

ქართულმა ინტერნეტ-საზოგადოებამ აიდგა ფეხი მირკში, გადავიდა ფორუმებზე და ახლა აქტიურად იყენებს სოციალურ ქსელებს.

ალბათ ბევრი ჩვენგანია გაწევრიანებული ამა თუ იმ ფორუმზე. მიუთითეთ პროფილში [და სიგნატურაში] თქვენი ბლოგის მისამართი – ადამიანი, რომელსაც დააინტერესებს თქვენი ვინაობა და შეიჭყიტავს – გადმოვა თქვენს ბლოგზეც და შეიძლება ერთგულ მკითხველადაც დარჩეს [forum.ge-დან ბოლო 30 დღის მანძილზე დაახლოებით 500 კლიკია გაკეთებული].

[ბლოგერების თემა ფორუმ.გე-ზედ.]

4. სოციალური ქსელები, ტვიტერი და ძმანი მისნი

Facebook, odnoklassniki, myspace, face.ge და ა.შ. – თუ ხართ სადმე გაწევრიანებული, მიუთითეთ პროფილში თქვენი ბლოგის ლინკი.

ფეისბუქზე და ტვიტერზე არის საშუალება ახალი პოსტის დაანონსებისაც – მიუხედავად იმისა, რომ გუგლ რიდერშიც მყავს – ბევრ ბლოგებზე გადავდივარ ფეისბუქის ანონსიდან.

ფეისბუქზე არის ჯგუფი – “ქართველი ბლოგერები”, შემოგვიერთდით: – http://www.facebook.com/group.php?gid=87421438898

5. ის, რასაც გადააკოპირებენ

ინტერნეტი მაინც ინტერნეტია და ვერ ვაკონტროლებთ ჩვენ მიერ გაშვებული ინფორმაცია სად და როგორ მოხვდება, აქტიურად ვერ დავიცავთ ტექსტზე საკუთარ უფლებებს და ა.შ.

თუმცა არის შემთხვევები, როდესაც სხვის მიერ ჩვენი კონტენტის კოპირებამ შეიძლება პირიქით – ჩვენზე იმუშაოს.

თაზომ თავის ბლოგზე რამდენჯერმე გააშუქა მიმდინარე მიტინგები და აქციები, დადო თავისი აგდაღებული ბევრი საინტერესო სურათი – და სურათებს მიაწერა თავისი ბლოგის მისამართი.

სურათები იმის შემდეგ რამდენჯერმე შემხვდა ფორუმზე -  უამრავმა ადამიანმა უნებლიეთ “წაიკითხა” თაზოს ბლოგის მისამართი.

6. კომენტარები

ბლოგინგი არ არის მხოლოდ პოსტების წერა და მერე წყნარად ჯდომა – სანამ ვინმე დოდკა სრულიად შემთხვევით არ გიპოვის და არ დაწერს შენი ბლოგის შესახებ.

ბლოგებს ბლოგერები კითხულობენ – ამიტომ იმისათვის, რომ მკითხველი მოიპოვო, შენც უნდა იყო სხვისი მკითხველი.

ბლოგერი, ვისთანაც კარგ, შინაარსიან კომენტარს ტოვებთ – 100%-იან გარანტიას გაძლევთ, რომ აუცილებლად გადმოვა და შეამოწმებს თქვენს ბლოგს. თუ მოეწონა, რაც დახვდება – გაგლინკავთ, ურჩევს სხვებს და თავადვე გახდება თქვენი მკითხველი.

წაიკითხეთ უფრო მეტი  კომენტარების შესახებ.

ბონუსი I

იხილეთ ყვავასა და პიკოს ახალი ვიდეოპოსტი “ქართული ბლოგების” თემაზე, ამ სერიების ერთგვარი გაგრძელება, რომელიც არ შემეძლო, არ აღმენიშნა.

ბონუსი II

შაბათს, 2 მაისს, 5 საათზე ბლოგერები ვიკრიბებით შარაგულში (ალ. ყაზბეგის №42). ვისაც გსურთ – შეგიძლიათ შემოგვიერთდეთ ხინკლის ნთქმაში და ხინკალსა და ხინკალს შორის – ბლოგინგის შესახებ საუბრებში.

დღეს ძალიან “მოსავლიანი” დღე მქონდა, მთელი 5 ახალი [ან - ჩემთვის ახალი] ბლოგი აღმოვაჩინე და დავიმატე.

http://nextdreamhacker.blogspot.com/ - უცნაური და საინტერესო ბლოგია ძალიან, ვიპოვე აქაური კომენტარებიდან. მადლობა ავტორს არსებობისთვის : ) აუცილებლად შეისეირნეთ.

http://dineba.blogspot.com/ – Jaco-ს ბლოგი. ამ ბლოგს რამდენიმე ხანია მივდევ გუგლ რიდერიდან, მაგრამ ბლოგროლში არ მყავდა. Прошу любить и жаловать )) ჩემი ერთ-ერთი ფავორიტი გახდა, გარდა საინტერესო კონტენტისა, მის ღირსებებში მალგანახლებადობაც შედის :D

http://tatsson.blogspot.com/ – ტატოს (tatsson) ბლოგი. ერთგვარი ლიტერატურული ბლოღი. მართალი გითხრათ, ჯერ არ წამიკითხავს, აწი ვაპირებ.

http://bunbunland.blogspot.com/ – პერწკლის პირადი ბლოგი. უკვე ვიცი, ვისაც შეუყვარდება ბუნბუნლანდია. : )

და ძიება უკიდურესად სასიამოვნოდ დამთავრდა ამ ბლოგით:

http://qristine.wordpress.com

ბლოგის ავტორი 17 წლის ქრისტინეა. დარწმუნებული ვარ, ბევრი თქვენგანი იწერდა წიგნებიდან ლამაზ და ჭკვიანურ ფრაზებს რვეულებში და ბლოკნოტებში (მე პირადად – ვიწერდი).

ქრისტინემ ეს იდეა “გააბლოგა”  და ახლა წიგნების კითხვის პარალელურად, მათგან ამონარიდებს პოსტავს ხოლმე.

ძალიან კარგი გადასათვალიერებელი იყო, მითუმეტეს – კონსტანტინე გამსახურდიას კითხულობს ახლა, და კომენტარიც დავუტოვე, რა თქმა უნდა.

მაგრამ იმ პასუხს, რაც მივიღე, ნამდვილად არ ველოდი.

თურმე ეს ბოვში შემოდის ჩემთან, კითხულობს ბევრი თვეა, ბლოგერობაც დაიწყო და კიდევ – (უუხ ეს მდუმარე მკითხველები!) უნდოდა, რომ შემეხედა მის ბლოგზე და არ მწერდა ამას კომენტარებში.

ჰა ახლა, ხოა მოსაკლავი?

ხო არა, მართლა ძალიან გამიხარდა. მხოლოდ ამ მიზეზით ამჯერად არ ვკლავთ.

: )

აქედან სადღაც 15-მდე – ვიცი ვინ არიან, კომენტარებს ტოვებენ და მეც მათ ბლოგებში ვზივარ სულ.

ჰოდა დანარჩენო მკითხველებო – რა დავწერო ისეთი, რომ ხმა აღიმაღლოთ? : ))