აღმოვაჩინე უმაგრესი რამ!

შეგიძლიათ იმავე დომენზე ვორდპრესისა და gmail-ის თანამშრომლობის შედეგად გქონდეთ მეილი თქვენინიკი@თქვენიდომენი.გე! უუმარტოვესი გასაკეთებელია, სულ რამდენიმე კლიკია საჭირო.

ამის შემდეგ ჩემი იმეილია – dodka@dodka.ge

[ვორდპრესის თუთორიალი იხილეთ აქ]

:სიხარულით ხტომა:

- – - – -

კომპი ვიყიდე! დიდი მადლობა afk.ge-სა და მის ავტორს იმისთვის, რომ ის არსებობს და ”ძველს” ეძახის კომპიუტერს, რომელიც 2009 წელს გამოსულ თამაშს ოოოდნავ ჭედავს, ყიდულობს ახალ კომპს და იმ ”ძველს”, რომლისნაირი ძლიერიც მე არასდროს, არასდროს მქონია და არც მექნებოდა კიდევ კარგ ხანს – გადმომცემს ფრიად იაფად.

:სიხარულით ხტომა:

_ _ _ _ _

საბა ჩამოვიდა გუშინ ამერიკიდან.

დღეს უკვე მუშაობა დავიწყეთ.

:სიხარულით ხტომა:

- – - – -

”ღამის შოუსთვის” რაღაც გადავიღეთ. ხვალ უნდა ვამონტაჟოთ და ზეგ წარვუდგინოთ. თუ მოეწონათ, ჩასვამენ რუბრიკად გადაცემაში.

სცენარის წერის და გადაღების პროცესში დავასკვენი, რომ მე არ შემიძლია ზვიოსნაირი იუმორის წარმოება, რომელზეც ხალხი ”ჰაჰაჰა”-ს ამბობს.

ამიტომ ბოლოს მივედით იმ დასკვნამდე, რომ ჩვენ გავაკეთებთ ისეთს, როგორიც გვეხერხება – ხუმრობებით საპატრიარქოზე, ქართულ ინტელიგენციაზე, ჟურნალისტებზე და ა.შ. თუ მოეწონათ, კარგია, თუ არადა იმათ იცინონ ისევ ზვიოზე, ჩვენ ნი2-ზე ვიცინებთ.

ამ დაკავებულობისა და სიხარულით ხტომის ჟამს ბავშვს დროებით ორივე მშობლის მაგივრობას კიბორგა უწევს:

ზღაპარი, რომელიც მოვუყევი ვილის გუშინ ძილის წინ (!)

იყო და არა იყო რა, იყო ერთი ბიჭი, რომელსაც ერქვა ვილი.

ერთხელ ვილიმ გადაწყვიტა წასულიყო დედიკოს და მამიკოს სახლიდან და თავისი აეშენებინა.

ჯერ მივიდა ქართული სერვერების ქალაქში. ქალაქის უბნებში გვერდიგვერდ იყო განლაგებული რამდენიმე სამშენებლო კომპანიის მიერ ნაშენები სახლები: ბუმ.ჯი, ლოგ.ჯი. ბლოგ.ჯი და სხვები.

ააშენა ვილიმ საკმაოდ დიდი და ლამაზი სახლი, თავის გემოზე მოაწყო, ლამაზი ავეჯი შეიტანა. თუმცა ძალიან უჭირდა იქ ცხოვრება – ხან კარი რჩებოდა ღია და ნაგვით ევსებოდა სახლი, ხან პირიქით – ეკეტებოდა და ვეღარ შედიოდა. ერთ დილასაც გაიღვიძა და აღმოაჩინა, რომ მისი ყველა ავეჯი გატანილი იყო და სახლთანაც ბულდოზერი იდგა – სამშენებლო კომპანიები გაკოტრდნენ და თან წაიყოლეს მისი სახლი და ქონება.

გული დასწყდა ვილის, მაგრამ საბრძოლო განწყობა არ დაუკარგავს. გადაწყვიტა ამჯერად სხვა ქალაქში ეცადა ბედი. ბევრი იარა თუ ცოტა იარა, მიადგა ქალაქ ბლოგსპოტს.

მაცხოვრებლებისგან მალევე შეიტყო, რომ ქალაქს არ ჰყავდა ადგილობრივი საპროექტო და დაგეგმარების კომისია, რის გამოც ვისაც როგორ უნდა ისეთ სახლებს იშენებდა და იმ ფერებზე ღებავდა. აი მესმის თავისუფლებაო, გაიფიქრა ვილიმ და ააშენა სახლი ბლოგსპოტში.

სამწუხაროდ, აღმოჩნდა, რომ ამ კომისიის გარდა ქალაქ ბლოგსპოტში კიდევ ბევრი რამ არ არსებობდა, არც პოლიციის დეპარტამენტი, არც კეთილმოწყობის განყოფილება. ქალაქში დათარეშობდნენ ქურდები, სახლში მოდიოდნენ დაუპატიჟებელი სტუმრები და უამრავ ნაგავს ყრიდნენ ირგვლივ. მეგობრები, ვისაც ვილი პატიჟებდა, ხშირად თავს იკავებდნენ მოსვლაზე – გზა ათხრილი იყო და ვილის სახლის კარიც ძნელად იხსნებოდა, სულ რაღაც რთულად გასარჩევ კოდებს ითხოვდა ხოლმე. გადიოდა ვილის დღეები მოწყენილობაში და ნაგვის კრეფაში.

ერთხელაც, როდესაც დედასთან იყო სტუმრად ჩაიზე, შესჩივლა ქალაქ ბლოგსპოტის შესახებ. დედას გაეცინა, თავისთვისაც დაისხა ერლ გრეი და უთხრა:

“მე მესმის, რომ შენ უნდა წასულიყავი მშობლიური ქალაქიდან, რათა შორიდან უფრო დაგეფასებინა. ქალაქ ვორდპრესში შენს დაბადებამდეც ვცხოვრობდით. აქ ვერ ააშენებ ისეთ სახლს, როგორიც გინდა და ვერ შეღებავ შენს გემოზე, რადგან ამ ყველაფერს ქალაქის მერია აკონტროლებს. სამაგიეროდ აქ არ არიან უზრდელი მეზობლები, ყველა ოჯახს გვყავს საკუთარი ძაღლი, სახელად აკისმეტი, რომელიც გვიცავს ნაგვისმყრელებისა და ქურდებისაგან. სახლის კარი კი მუდამ ღიაა და ყველა სიხარულით მოდის ფინჯან ჩაიზე. რა აზრი აქვს სახლი გარედან რა ფერი იქნება, მთავარია შიგნით იყოს სისუფთავე და მყუდროდ მოაწყო.”

ვილი დაფიქრდა და მიხვდა, რომ დედიკო სიმართლეს ეუბნებოდა, დაბრუნდა ბლოგსპოტში, გამოზიდა იქიდან თავისი ნივთები და ავეჯი და დასახლდა ვორდპრესის ლამაზ, მზიან, გამართულ ქალაქში.

და ცხოვრობდა ბედნიერად და მშვიდად უკუნითი უკუნისამდე.

დასასრული.

ჰოი საოცრებავ, ქართველ ონანისტ ვარეზნიკთა არმიამ აქაც შემოაღწია და პარნუხის ვარეზნიკის გაკეთება დაიწყეს.

ეგრევე მივაჭირე report blog as mature-ს.

მეორე დღესვე გაქრა ბლოგი.

გამისწორდა. :D

_ _ _ _ _

ამ ბლოგპოსტის გაზიარება მინდოდა დიდი ხანია. საერთოდ, ხშირად ვფიქრობ ხოლმე ნაკლებადცნობილი ბლოგებიდან პოსტების ამოკრებას, ზოგი ისეთია, რომ მენანება მხოლოდ ორიოდე ადამიანის საკითხავად. მერე მავიწყდება ძირითადად :D

ჩემთვის ბლოგებში ერთ-ერთი პრობლემა ის არის ხოლმე, რომ ბლოგროლში ჩამოთვლილ რაიმე საიტს რომ ვკლიკავ, გადადის პირდაპირ იქ, “საწყის” ბლოგს “ვკარგავ”. ანუ ლინკები ცალკე ფანჯარაში არ იხსნება, რაც ძალიან მოსახერხებელი იქნებოდა – იმიტომ, რომ ხშირად ბლოგის თვალიერება დამთავრებული არ მაქვს ხოლმე, მერე უკან გადმოვდივარ და ა.შ. მოკლედ, სანამ ჩემი ჭკუა მოიფიქრებს, რომ შიფტს დავაჟირო და ისე დავკლიკო ლინკს (open page in new window), ასე ვწვალობ ხოლმე.

დღეს ვორდპრესში ნინიკოს ბლოგის დამატებისას სრულიად შემთხვევით დავკლიკე Advanced options – targets. და ჰოი საოცრებავ, რას მეუბნება! თუო აირჩევ აქო ამასო: _blank, მაშინ ამ ლინკს ცალკე ფანჯარაში გახსნის დაკლიკვისასო.

ბედნიერად შევხტი სკამზე, დავუარე ყველა ლინკს, რაც კი მაქვს ბლოგროლში, და გადავიყვანე მაგ _ბლანკ-ზე. ახლა ვტკბები, რომ დაგაინტერესებთ სხვა ბლოგებზე წასვლა, აქედან არ დაიკარგებით თან, ისინი ცალკე ფანჯრებში გაიხსნება : )

რჩევა ყველას, ვინც ვორდპრესის ძრავაზე მუშაობს: ყურად იღეთ ეს აღმოჩენა.
რჩევა ყველას, ვინც ბლოგერზე ან სხვა ძრავაზეა: მოძებნეთ, აუცილებლად იქნება რამე მსგავსი თქვენთანაც.

sweet baby girl- იქნებ გაუზიარო ხალხს შენი ბლოგსპოტისეული გამოცდილება ამ ამბავში ბლოგერებს : )

Updated: ახლა ვეძებ ფუნქციას, რომელიც პოსტში მითითებულ ლინკებსაც ცალკე გახსნის. ვინმემ თუ იცით, გამიზიარეთ რა.